د روان میلادي کال د مارچ په ۲۹مه په پاکستان کې د لومړي وزیر په توګه د شهباز شریف تر ګومارنې وروسته د امریکا ولسمشر، جو بایډن هغه ته یو لیک واستاوه. دا لیک، چې د پاکستان او امریکا د دوامداره مشارکت او توافق موضوع پکې نغښتې ده، په داسې حال کې استول کیږي چې پاکستان له لویو ناورینونو سره مخ دی. بایډن په دغه لیک کې د پاکستان سیاسي، امنیتي، اقتصادي ناورینونه او اقلیمي بدلونونه د دواړو دولتونو د نږدې کېدو لپاره فرصت ګڼلی چې له هغه څخه د امریکا د نړیوالو او سیمه‌ییزو ګټو او موخو لپاره کار واخلي.
د دې تر څنګ په دې وروستیو کې د عمران‌خان د تحریک انصاف ګوند یوه غړي په افغانستان او سیمه کې د امنیتي موخو لپاره د پاکستاني دولت لخوا امریکا ته د بلوچستان د هوايي اډو د ورکولو خبر ورکړی او دا کار یې د پاکستان دولت لخوا خیانت ګڼلی دی. څو میاشتې وړاندې هم د پاکستان د پوځ مشر عاصم منیر په یوه رسمي سفر کې د امریکا له ځینو لوړپوړو ملکي او نظامي چارواکو سره ولیدل او په یاد سفر کې د پاکستان د پوځ لپاره نوی رول او ماموریت ورکړل شو.
لکه څنګه چې ښکاري، په ۲۰۲۱ کال کې له افغانستانه د ناټو ځواکونو تر ذلیلانه وتلو وروسته د پاکستان دولت په یوه سیاسي، امنیتي او اقتصادي کړکېچ کې ګیر شو. دا چې د پاکستان خاین حکام تل خپله ظالمانه بقا د امریکا د سیاستونو په مزدورۍ کې لیدلې، هڅه یې کړې چې تر پخوا ډېر په سیمه کې د امریکايي ګټو د خوندي کوونکو په توګه را څرګند شي. دا په دې معنا ده چې افغانستان د یوه امریکایي دولت په څنګ کې پروت دی؛ داسې دولت چې سیاستونه یې د امریکا د رضایت لپاره دي او د امریکا له چینله له افغانستان سره سیاست کوي.
نن د امریکا تر ټولو لویې ګټې په دې کې دي چې افغانستان او شاوخوا سیمې پر یوه داسې مقتدر دولت بدلې نه شي چې په سیمه کې د اسلام د راژوندي کولو هڅه وکړي. په افغانستان او پاکستان کې د امریکا امنیتي ګټې د سیمې د مجاهدینو د صفونو په متفرق‌کولو او ګواښولو کې دي چې له دې لارې خپلې د ترهګرۍ ضد مبارزې اجنډا ته دوام ورکړي او د پاکستان دولت په دې برخه کې د خپل سرتېري په توګه وکاروي.
د افغانستان د اشغال په تېرو شلو کلونو کې، د پاکستان دولت له ناټو په ځانګړي توګه له امریکا سره د همکار او تسهیل کوونکي دولت په توګه کار کاوه. اوس چې په افغانستان کې فزیکي اشغال پای ته رسېدلی، امریکا د پاکستان مزدور دولت د هغه څه په برخه کې چې دوی یې ترهګري بولي، له همکار او تسهیل کوونکي دولت څخه پر فعال او مخکښ دولت بدل کړی.
په افغانستان کې د ایمن‌الظواهري د شهادت لپاره د امریکا لخوا د پاکستان د فضا کارول او د امریکا په څېر د حربي کافرانو په خدمت کې د هوايي اډو د ورکولو احتمال د دې موضوع ښکارندویي کوي چې پاکستان اوس هم د امریکا په کنټرول کې دی او هڅه کوي چې د امریکا له ادرسه د افغانستان له حاکم نظام سره اړیکې ولري.
امریکا ښه پوهیږي چې د سویلي اسیا، په ځانګړې توګه د افغانستان او پاکستان خلک لوړ ایماني او مادي ظرفیت لري. د هغوی د نه کنټرول په صورت کې په دې سیمه کې د امریکايي نظام د راپرځولو او د دغو دوو اسلامي خاورو د یووالي امکان شته. نو د امریکا په اند اړینه ده چې په لوړه کچه د دغو دوو سیمو د خلکو له لا ډېر نږدې‌والي څخه د تل لپاره په بېلابېلو تګلارو مخنیوی وشي او تر منځ یې د تفرقې او بې‌اعتمادۍ تخم وشیندل شي. په دې وروستیو کې د پاکستاني حکامو لخوا د کرکې خپرولو ریښه هم په همدغه سیاست کې ده.
نو اړینه ده؛ څرنګه چې په افغانستان کې د فزیکي اشغال د له منځه وړلو لپاره هڅه شوې وه، له پاکستاني مزدور او خاین دولت سره هم په قاطعیت چلند وشي. داسې چلند چې په هغه کې د دواړو لورو له مجاهدینو څخه ملاتړ او د ډیورند استعماري کرښې د له منځه وړلو لپاره د اسلام پر اساس هڅه وشي. اړینه ده چې د ډیورند کرښې د دواړو لورو خلک او حاکمان له دې امریکايي اجنډا څخه ځان خبر کړي او د دغه سیاست په لومه کې ونه لوېږي. د دواړو خاورو مخلص عناصر دې هڅه وکړي چې د امریکا د دغو لوبو د خنثی کولو هڅه وکړي او د دواړو خاورو د یووالي، د نبوت پر منهج د خلافت د تاسیس او د اسلام د هراړخیز او ټولیز پلي کولو لپاره زمینه برابره کړي.